Druidaria

this text in English

Esta secçom oferece só umha aproximaçom aos temas tratados. Na capa deste blogue, noutras secçons, redes sociais e nas diversas actividades da IDG vam-se detalhando múltiplos aspectos da Druidaria em geral e da Druidaria Galaica em particular.

Tudo é sagrado e nós somos parte do todo. Partes diminutas mas necessárias para a plenitude da Natureza.

Que é?

A Druidaria (‘Druidismo’) é umha religiom[*] nativa europeia que tem as suas origens nas crenças, ética e forma de vida dos povos celtas.

A primeira referência escrita conhecida de Druidaria remonta-se ao século IV antes da era actual, embora as suas raízes – a chamada Tradiçom Primordial – som muito mais antigas e, consideramos, encontra o seu berce no território da Callaecia (actual Galiza e Norte de Portugal).

Chama-se Druidaria por conformarem os Druidas e Druidesas a caste sacerdotal e intelectual dessa sociedade.
Na antiguidade elas eram as juízes, filósofas, teólogas, por vezes sanadoras e muitas vezes administradoras dos diversos clãs, actuando como autênticos vínculos de uniom e coesom entre todas as comunidades célticas.
Eram figuras de alto prestígio encarregadas da investigaçom, educaçom, resoluçom de litígios e ritos religiosos. Todos os Druidas e Druidesas – e portanto todos os povos célticos – partilhavam umha moral, cosmovisom, celebraçons e sentido da justiça e convivência muito similar, senom idêntico.

Apesar da sua perseguiçom já desde o século I antes da nossa era, a Druidaria continuou latente por séculos em muitos territórios de legado cultural celta camuflada entre outros nomes ou sob os eufemismos de “pré-romano” ou “pagao”, mas perdendo a sua anterior uniformidade e organizaçom. Contudo, e apesar das diversas vicissitudes históricas e quebras na linha de transmissom, houvo umha renascença da Druidaria como tal a partir do século XVIII.

Há diversos achegamentos à Druidaria na actualidade, cada um adaptado à herdança histórica, realidade local ou às necessidades dos respectivos clans.
A Irmandade Druídica Galaica (como é explicado na página sobre a IDG) procura nas expressons religiosas, espirituais, culturais e filosóficas autóctones do velho território galaico os referentes para os seus ritos, práticas, valores e crenças actuais, mas procurando evitar anacronismos com o objectivo de fazer esta crença druídica relevante aos e às Druidistas (crentes) de hoje em dia. A Druidaria, agora, avança cara o futuro.

A visom geral da Tradiçom Druídica Galaica nom difere grande cousa da Druidaria Pan-Céltica e pode-se resumir de forma breve em:

• Honra e respeito aos Devanceiros e Devanceiras, as pessoas que nos precederam e o seu saber, pois sem eles e elas nem estaríamos aqui nem seríamos quem somos. A IDG defende a história, cultura e memória da Terra e o Povo que a acolhe e sustenta.
• Honra, respeito e reverência à Natureza, pois esta é um todo que nos agarima e nós somos parte indissociável dela. A IDG é fundamente Panteísta e Ecologista.
• Aceitaçom da complexidade da realidade desta Natureza, do Cosmos, que esconde ainda aspectos como a transcendência de toda vida, reencarnaçom, conexom universal e presença do todo no particular e o particular no todo. A IDG é Monista.
• Aceitaçom das diversas manifestaçons desta complexidade, bem de forma simbólica ou real, através de diversos médios, objectos e seres, por via do chamado Imbás ou Awen (inspiraçom) e que normalmente representa-se em forma tripartita. A IDG é Animista.
• Honra e respeito aos Deuses e Deusas da nossa tradiçom, fruto da Natureza e da sua complexidade, mestres para quem quiser aprender. A IDG é Politeísta.
• Observância do calendário druídico ou Roda do Ano e atençom aos ensinamentos e recomendaçons dos Druidas e Druidesas (Durvates) reconhecidos. A IDG é umha organizaçom legalmente estabelecida e perfeitamente estruturada, com regras e normas claras e presença pública.

Isto tudo pode ser resumido ainda mais em três premissas básicas:

– Honra os Devanceiros e Devanceiras.
– Reverência a terra e a Natureza.
– Aprende dos Deuses e Deusas.

Para chegarmos a estes pontos nom existem na Druidaria revelaçons ou livros sagrados, apariçons ou milagres, nem pecados, castigos ou salvaçons universais. O agir druídico baseia-se em três eixos fulcrais que som a Responsabilidade, a Honra e o Compromisso, assim como nas experiências e reflexons individuais e colectivas para tentarmos conhecer mais e melhor tudo aquilo que nos rodeia de forma lógica, ordenada e com mentalidade aberta. Isto só constitui já umha liçom e um projeto vital, reconhecendo as nossas limitaçons que som, à vez, um repto a superar.

Por isto, por exemplo, na Druidaria nom se fai proselitismo. Cada ser humano deve chegar às suas conclusons após empreender o seu próprio caminho de descoberta espiritual. Na Druidaria podem-se dar respostas a perguntas de nom-crentes se estas forem formuladas, mas a IDG rejeita qualquer tentativa de conversom. A Druidaria, na sua vertente religiosa, expom e explica a sua opiniom, nom tenta convencer.

Além disto, há umha série de princípios éticos aceitados pola maioria de Druidistas no mundo com estes nomes ou parecidos. Estes som os Nove Compromissos:

Compromisso com a Natureza – Compromisso com a Humanidade – Compromisso com a Paz – Compromisso com as Raízes – Compromisso com a Liberdade – Compromisso com a Independência – Compromisso com a Espiritualidade – Compromisso com o Conhecimento – Compromisso com a Verdade

Estes Nove Compromissos venhem complementados polas Nove Virtudes célticas: Honorabilidade, Justiça, Lealdade, Valentia, Generosidade, Hospitalidade, Humildade, Sabedoria, Eloquência.

A IDG prima o aspecto de responsabilidade e harmonia: A responsabilidade é individual, se bem o caminho solitário deve ser equilibrado com a experiência em Comunidade.
Eis um elemento da focagem druídica galaica: o equilíbrio entre a liberdade da pessoa Druidista e a responsabilidade e compromisso com o Clan; o balanço entre o indivíduo e a sua singularidade e o seu contributo ao conjunto como tal.
O conjunto é melhor com a uniom de pessoas fortes e complementares, gente com ideias próprias e propostas diversas e originais trabalhando ao uníssono, com honor e sentido de finalidade comum.

Como guia prático no nosso dia a dia elaboramos as Nove Regras de Conduta Druídica, ou umhas simples recomendaçons por onde começarmos a fazer do nosso mundo um lugar melhor seguindo umha lógica céltica.

 

O que a Druidaria nom é: Para nós a Druidaria nom é umha simples filosofia, caminho espiritual, estilo de vida ou forma de entender a cultura. É isso tudo, claro, mas é muito mais. É principalmente umha religiom[*] (no sentido mais amplo da palavra), onde a IDG é umha entidade religiosa organizada que eventualmente fai interpretaçons religiosas autónomas.
Nom consideramos o nosso Caminho como sendo o único possível, em absoluto, e respeitamos plenamente as visons doutros grupos ou organizaçons, mas esta aqui e agora é a focagem da IDG.

A Druidaria nom é umha religiom passiva ou contemplativa, nunca o foi, ao estar sempre vencelhada aos interesses e dignidade do seu Povo, da sua Comunidade.
A nossa implicaçom é com a defesa do que consideramos correcto (os Nove Compromissos Druídicos) sempre mediante métodos pacíficos mas activos (através das Nove Virtudes). Valorizamos a atitude de “maos à obra” na melhora do nosso mundo, nom a mera teoria ou debates sem mais transcendência. Assim, consideramos que há umha série de valores e ideias dignas de partilha sem que isso implique proselitismo nem imposiçom de nengum tipo.

É certo que a Druidaria pode resultar algo confusa para quem começa a conhecê-la, pois muitos elementos e conceitos talvez nom sejam tam claros como noutras religions ou sistemas de crenças; podem ser ambíguos, complementares à vez que (aparentemente) contraditórios.
O facto é que a maioria de nós crescemos numha sociedade onde o divino disque é misericordioso, amoroso e que exige aos crentes sujeiçom às suas regras em troca da concessom da sua ajuda e apoio. No entanto, na nossa crença devemos atravessar umha porta que exige sacrifício, demolir paredes velhas para começarmos a entender o que o mundo é e qual é o nosso lugar nele.
Embora as Deidades nos “acariciem” com boa intençom, o seu toque derruba esses muros que nos rodeiam e que nos impedem compreender, e este pode ser um sentimento estranho e até doloroso. Compreendermos-lhes e compreenderem-nos leva tempo, mas depois tudo adquire sentido pleno.

 

Ritos e celebraçons

A IDG celebra diversos ritos passagem e serviços religiosos a petiçom do Clã, mas existe tamém a observância do calendário céltico (Roda do Ano) e as suas festividades. Há quatro datas principais:

• Magusto (Samhain): 31 Outubro – 1 Novembro. Festa dos Deuses Berobreo, Bandua e da Deusa Cale. Celebraçom do Ano Novo e dos Devanceiros e Devanceiras. Recolhimento, reagrupamento e reflexom.
• Entroido (Imbolc): 1-2 Fevereiro. Festa da Deusa Brigantia. O triunfo sobre o Inverno e passo cara a Primavera. Esperança e alegria.
• Maios (Beltaine): 1 Maio. Festa do Deus Bel. A grandiosidade da Natureza na Primavera. Poder, vida e energia.
• Seitura (Lughnasadh): 1-2 Agosto. Festa do Deus Lugo. O esplendor do Verám, celebraçom das colheitas. Plenitude e acougo, planificaçom e racionalidade.

Podem-se completar estas celebraçons com outras quatro menores nom associadas a Deidades fixas, onde os solstícios som mais relevantes que os equinócios: Solstício de Inverno-Noite Nai (21-22 Dezembro e noite do 24); Equinócio de Primavera-Festa da Alvorada da Terra (21-22 Março); Solstício de Verám-Noite dos Lumes (21-22 Junho e noite do 23); Equinócio de Outono-Festa das Fachas (21-22 Setembro).

Observa-se, ainda, o 25 de Julho como celebraçom popular do Dia da Terra (Dia da Galiza) e algumhas outras datas de carácter histórico ou simbólico (nom religioso) que som lembradas quando chega o momento.

As actividades druídicas nom precisam necessariamente de templos ou construçons similares, pois muitas vezes som realizadas em contornos naturais. Procura-se abeiro ajeitado em caso de condiçons atmosféricas adversas e, ainda assim, tenta-se que haja sempre elementos naturais presentes.
Existiam e existem na Europa templos druídicos, mas estes som lugares de reuniom no estilo do indicado anteriormente: locais para facilitarem a juntança do Clã dependendo das condiçons, necessidades e logística do momento. Havia e há, de facto, diversidade nas formas e tamanhos. A IDG nom dispom (ainda) dum templo, sede ou local de acesso público, mas trabalha-se nisso com um bocado de ajuda…

– – –

[*] O conceito actual de “religiom” é umha mera construçom ocidental que começa no século XVII e acaba de tomar forma só no século XIX no ronsel do supremacismo cristao, mas é umha palavra que hoje em dia, nestes contextos nos que falamos, toda a gente percebe como algo minimamente organizado e com vocaçom de continuidade, e organicamente isso é o que é a IDG.

Porque a verdadeira tradiçom nom emana do passado, nem está no presente, nem se alvisca no porvir; nom é serva do tempo.

A tradiçom é a alma eterna da Galiza, que vive no instinto popular e nas entranhas graníticas do nosso chao.

A tradiçom nom é a historia. A tradiçom é a eternidade.

A.D.R. Castelao (1944)

Advertisement