IDG

A Irmandade é estudo, trabalho e serviço, mas tamém é celebraçom, orgulho da nossa cultura, lembrança das raízes que permitirám estarmos no futuro.

A Irmandade Druídica Galaica (IDG) é umha associaçom sem fins lucrativos formada por Caminhantes (membros) da tradiçom druídica galaica e que zela pola recuperaçom e preservaçom da cultura, filosofia e espiritualidade nativa da nossa terra.

A IDG está registada oficialmente como entidade religiosa com o Ministério da Justiça espanhol com o número 022549 e conta, portanto, com atribuiçons e protecçom legal. Do mesmo modo, está tamém registada com a Agência Tributária (R3600437B). A IDG é umha entidade associada da Rede do Património Cultural galega. A IDG nom é membro mas trabalha frequentemente em colaboraçom com a Celtic Druid Alliance (organizaçom internacional).

A Irmandade oferece acovilho a crentes druídicos (Druidistas), assim como favorece a celebraçom conjunta de rituais e observância do calendário céltico em comunidade. Aliás, a Irmandade oferece serviços religiosos e conselho a petiçom do Clã.

A Irmandade Druídica Galaica partilha os princípios gerais da Druidaria expressados por outras comunidades druídicas no mundo, mas com umha ênfase especial na tradiçom própria e legado céltico galego, que consideramos ser cerne do Celtismo Atlântico. Existe, de facto, umha continuidade nas crenças, folclore e carácter galego que pode ser rastreada até os tempos da velha Civilizaçom Céltica Galaica. Deste jeito, a Irmandade presta muita atençom à precisom histórica e evidências documentais existentes, aprendendo cada dia segundo critérios objectivos. Assim e todo, a visom da Druidaria da IDG adapta-se ao tempo contemporâneo para evitar anacronismos e fazer esta crença druídica relevante às pessoas de hoje em dia, tendo em conta que esta é, afinal, umha associaçom religiosa totalmente independente onde som feitas interpretaçons religiosas autónomas.

Porém, a Irmandade Druídica Galaica nom cópia outros modelos de Druidaria nem outras tradiçons ou escolas, nem fai reconstruçons arbitrárias. A IDG procura primeiro nas expressons religiosas, espirituais, culturais e filosóficas autóctones do velho território galaico os referentes para os seus ritos, práticas, valores e crenças actuais. Só quando estas fontes originais estám incompletas ou simplesmente desaparecidas acode-se ao entorno geográfico-cultural imediato, é dizer, à Céltia da Europa Atlântica e, se preciso, à grande Céltia Pan-Europeia.

Dito isto, a IDG considera este caminho válido para os seus membros e entende que tem significado pleno na Galiza actual, o chamado Norte de Portugal e demais zonas de cultura galaica, o qual nom implica que outras vias druídicas nom poidam ser perfeitamente legítimas para diversos indivíduos ou colectivos, ou que nom poida haver um fluído e amigável diálogo e relacionamento. Noutras palavras, entende-se esta como umha visom desde e para esses territórios da antiga Callaecia, nem melhor nem pior, mas que simplesmente afunde as suas raizeiras nuns referentes e numa espiritualidade já bem familiar para nós. Desejamos sempre, isso sim, que a nossa experiência e trabalho possa ser de utilidade para quem nos quiser ler ou conversar connosco em qualquer parte.

 

O que a IDG nom é:

– A IDG nom é umha simples associaçom cultural ou grupo que segue só umha filosofia ou determinado estilo de vida. Além doutras consideraçons, a IDG é principalmente um associaçom religiosa organizada – para nós a Druidaria é umha religiom (no sentido mais amplo da palavra e entendendo que pode ser um termo controverso) – que evidentemente toma com total seriedade os aspectos espirituais e transcendentes. Temos normas e princípios onde nom vale o “tudo vale”.

– A IDG nom é um grupo “secreto” ou “misterioso”. A IDG realiza actos públicos e abertos (muitas vezes colaborando com outros grupos nom-religiosos), onde é possível falar connosco livremente assim como contactar-nos. As pessoas podem solicitar a sua entrada ou saída da nossa associaçom à vontade, tal e como fica explicado nos nossos estatutos. O que certamente nom fazemos é proselitismo.

– A IDG nom é umha organizaçom passiva ou contemplativa porque a Druidaria nom é assim, nunca o foi, ao estar sempre vencelhada aos interesses e dignidade do seu Povo, da sua Comunidade. A nossa implicaçom é com a defesa do que consideramos correcto (os Nove Compromissos Druídicos), sempre mediante métodos pacíficos mas activos (através das Nove Virtudes). Valorizamos umha atitude construtiva e envolvida na melhora do nosso mundo, nom a mera teoria ou debates sem mais transcendência.

– A IDG nom é umha entidade com fins lucrativos. O dinheiro ou recursos que poidam ser angariados som utilizados única e exclusivamente para a manutençom da própria entidade, tentando garantir a sua viabilidade futura. Se houver algum tipo de extra este é dedicado a obras sociais ou planos a longo prazo. Todos os fundos som conseguidos por via de doaçons voluntárias ou material, nunca mediante quotas fixas, dinheiro público, subvençons ou vantagens fiscais.

 

Organizaçom

A IDG distingue os e as crentes em geral (Druidistas), um corpo de Caminhantes (membros oficiais da IDG), e ainda depois três possíveis títulos: o Bardo, que é um título honorífico, e dous graus religiosos como som Ovate (iniciado/a) e Durvate (Druida/Druidesa).

Os e as crentes druídicos em geral, ou Druidistas, nom tenhem que dar o seu nome para nada nem se alistarem em rem. Esse ou essa podes ser tu, lendo estas linhas, e a IDG tentará sempre te estender os seus serviços e ajuda de forma desinteressada. O conjunto de todos e todas as crentes druídicas galaicas é o que denominamos a Treba Mor (Grande Tribo) ou Comunidade.

A Caminhante é umha pessoa que entra a formar parte da estrutura da IDG. É alguém que vai um passo além, adquirindo um decidido compromisso pessoal e prático – mans à obra – na ajuda diária à IDG. A Caminhante respeita, aceita e defende os princípios druídicos, assim como as normas e organizaçom da IDG. A uniom de todos e todas as Caminhantes é o Clã Mor (Grande Clã).

Para mais informaçom detalhada em como virar Caminhante veja-se o apartado de filiaçom.

Como é óbvio, nom é preciso ser Caminhante para ser simplesmente crente da Druidaria ou crente na linha representada pola IDG.

Por outra banda, Bardo é umha pessoa detentora da memória, conhecedora da história, lendas e realidades, música e poesia. É umha grande comunicadora, guardiã e transmissora do saber da Treba Mor. A Bardo nom oficia rituais religiosos nem toma decisons, mas a sua palavra é sempre válida e ouvida. É a conselheira dos Druidas e Druidesas. Bardo é um título honorário que pode ser dado tanto a Druidistas, Caminhantes ou Ovates, assim como a pessoas cuja relevante contribuiçom à Druidaria, à IDG ou aos princípios e fins que defende a fagam digna de tal distinçom.

Dentro das categorias estritamente religiosas, Ovate é o primeiro chanço no ordenamento druídico. A Ovate é umha estudante activa da Druidaria que pode aspirar ser Druida ou Druidesa. A Ovate pode assistir a Bardos e Druidas e ajudar na organizaçom e ritos da Irmandade. A Ovate deve ganhar o direito a usar tal nome.

A Druidesa / O Druida –  Durvate ou Durbede – é a figura que pode oficiar ou designar oficiante, atender os ritos sacerdotais e serviços demandados, resolver disputas e tirar dúvidas, aconselhar sobre questons de crença, marcar o calendário e interpretar sinais. A Durvate nom é escolhida pelos Deuses nem é a sua única voz, nem é infalível, mas é alguém reconhecida pelo Clã e ratificada pelo Conselho Druídico como pessoa de sabedoria. O conjunto de Durvates formam o Conselho Druídico Galaico. O título de Durbede reserva-se só nas mençons respeitosas a Druidas e Druidesas passados.

As Durvates, e por tanto a Irmandade, dividem-se em jurisdiçons territoriais ou Trebas. Cada Treba tem umha Durvate Treba ou responsável máxima, coordenadora das outras Durvates nesse lugar. A coordenadora de todas as Trebas, líder do Conselho Druídico e por tanto da Irmandade, é o/a Durvate Mor (Arqui-Druidesa/Druida).

O actual Durvate Mor da Irmandade é /|\Milésio.

Por outro lado, a IDG dispõe duma Junta Directiva onde os cargos podem ou nom ser pessoas iniciadas, pois lida-se aí com funçons meramente administrativas.

 

Relaçons exteriores

A IDG reconhece – e é reconhecida numa rede de reciprocidade amigável – outros grupos e organizaçons druídicas (e nom-druídicas), apesar das possíveis diferenças de tradiçom ou culto, respeitando em todo momento a independência e peculiaridades de cada umha. Assim, a IDG aplica os seguintes pontos mínimos no estabelecimento de relaçons com outros grupos druídicos sérios:

– Atitude aberta e honesta em relaçom às tradiçons célticas nativas. É dizer, grupos envolvidos na pesquisa, estudo, práctica e ensino do património e espiritualidade exclusivamente céltica, sem misturas, ecletismos ou invençons sem fundamento.
– Nom-mercantilismo. É dizer, só grupos e organizaçons sem fins lucrativos, sem interesse de promoçom pessoal ou comercial.
– Grupos nom-racistas, nom-sexistas, nom-fanáticos. É dizer, grupos com umha presença pública clara e respeitável, de impecável reputaçom (ver aqui o nosso “Aviso de Intolerância” ).
– Contra o maltrato animal e solidamente ligados ao ambientalismo. É dizer, grupos que situem a Natureza e a sua defesa num lugar central e visível da sua ética e filosofia.

Alguns deste grupos amigos encontram-se no apartado de ligaçons de Druidaria Amiga (coluna na parte direita desta página).

 

Ficha da IDG, seguindo o modelo internacional para Ordens e Grupos Druídicos:

Localizaçom: Galiza. Âmbito de acçom da denominada “comunidade autónoma galega”, zonas limítrofes orientais de cultura e fala galega e Norte de Portugal (até o Mondego).

Presença web: http://www.durvate.org e alternativamente em http://www.facebook.com/Durvate, http://twitter.com/Durvate e canal de Youtube. Existem tamém perfis em ask.fm e em Google+ , mas esses dous encontram-se em total desuso.

Fundaçom: 11 Novembro 2011.

Linha: Druidaria Galaica (Atlântico-Europeia), reconstrucionista adaptada.

Ênfase em: Aspecto espiritual e social. Ritos e serviços. Normalizaçom e dignificaçom das nossas crenças. Defesa do património, cultura e tradiçons galaicas.

Idiomas: Galego-Português como idioma por defeito e único para liturgia. Outros idiomas (principalmente inglês) para comunicados esporádicos e relaçons exteriores.

Símbolos principais: Awen com tríscele galaico no topo girando de Oeste a Este. De preferência com raios verdes e aspas azuis.

Textos de referência: Estudos sobre a religiom galaica antiga. Textos sobre a história, etnografia, geografia e sociologia da Europa Atlântica.

Condiçons de admissom: Ser Crente da Druidaria Galaica (Druidista), aceitar as normas da IDG, completar um formulário e passar um período de prova (consideraçom de “Caminhante”).

Cerimónias: As quatro principais do calendário céltico: Magusto (Samhain), Entroido (Imbolc), Maios (Beltaine) e Seitura (Lugnasad). Equinócios e solstícios discricionais. Ritos passagem e serviços religiosos a petiçom do Clã. As cerimónias podem ser universais (membros e nom membros da IDG), gerais (membros da IDG) ou privadas (só Durvates e convites directos).

Frequência: Anual para as celebraçons de calendário. Discricional para serviços religiosos a petiçom do Clã.

Graus de iniciaçom: Sim. Três principais (Ovate, Bardo, Durvate) e subníveis para cada um.

Carácter sacerdotal: Sim.

Rito de iniciaçom: Sim, nas ordenaçons de Ovates e Durvates. Discricional nos Bardos.

Iniciaçom da mulher: Sim. Nom há distinçons entre mulheres e homens.

Atribuiçom dum nome iniciático: Nom requerido (voluntário).

Promessas: Sim, na iniciaçom de qualquer um dos graus.

Vestidos cerimoniais: Sim, nomeadamente para Durvates. Roupas em branco, azul ou verde som recomendadas para Bardos e Ovates em cerimonias formais. Os Durvates devem ter, de nom ser por motivos médicos ou naturais, cabelo comprido como mínimo por debaixo das orelhas.

Ensinamento: Sim. Na rede e por escrito, mas o ensinamento presencial é essencial.

Publicaçons: Nom sistemáticas nem regulares.

Cerimonias familiares: Sim, a petiçom dos Crentes e após formalizaçom com estes.

Incompatibilidades: Estar adscrito/a de maneira voluntária ou ser membro activo/a duma outra religiom ou movimento espiritual nom druídico, reconhecido ou nom. Usar a associaçom à IDG para fins de promoçom pessoal ou proselitismo. Atentar contra os Direitos Fundamentais do Ser Humano e/ou Direitos Fundamentais dos Animais. Dedicar-se à caça e pesca como actividade lúdica ou desportiva. Ser membro dos corpos e forças de segurança do Estado Espanhol. Desonrar ou atentar contra a cultura, povo e Terra Galaica.

 

Durvate logo
O selo da Irmandade: O Tríscele da nossa mais anterga Tradiçom, o Awen da renascença Druídica, o “torques virtual” em letras da contemporaneidade. Três épocas, três aspectos, umha realidade e um compromisso.
Anúncios

10 thoughts on “IDG

    1. Obrigad*s Paulo 🙂 Somos humildes, mas tentamos fazer as coisas o melhor que sabemos e vamos aprendendo no caminho. O mais importante é que as pessoas entre em contacto entre elas e falem livremente. Esse, talvez, é o nosso principal objectivo, poder ser um ponto de encontro para a gente que acredita nisto que dizemos.

  1. duas pessoas q se dizem videntes ja me falaram sobre ovates, e isso me intrigou, por isso queria saber mais

    1. Olá,
      A palavra ovate tem tido diferentes significados ao longo da história. Para algumas pessoas ovate era um tipo ou especialização de Druida na antiguidade, nomeadamente aqueles/as com capacidade de “verem além”. Contudo, desde os começos da época contemporânea da Druidaria (S.XVIII), a palavra ovate ficou associada a um grau iniciático, prévio ao de Druida. Assim, na IDG, ovate é o primeiro nível de iniciação, por sua vez dividido em três sub-níveis; só depois de completado este processo uma pessoa pode chegar a ser Durvate (Druida/Druidesa) na nossa organização.
      PD. Não faz falta ser vidente para saber isto 😉

  2. não tinha ccunhecimento algum sobre ovates ou druidas, mas recentemente após uma situação na qual me vi envolvida fiquei bastante curiosa sobre o assunto,gostaria de saber onde posso encontrar artigos ou livro sobre a sua história

Deixe um comentário / Leave a comment

Preencha os seus detalhes abaixo ou clique num ícone para iniciar sessão:

Logótipo da WordPress.com

Está a comentar usando a sua conta WordPress.com Terminar Sessão /  Alterar )

Google+ photo

Está a comentar usando a sua conta Google+ Terminar Sessão /  Alterar )

Imagem do Twitter

Está a comentar usando a sua conta Twitter Terminar Sessão /  Alterar )

Facebook photo

Está a comentar usando a sua conta Facebook Terminar Sessão /  Alterar )

Connecting to %s